ઉત્તર-પશ્ચિમ ભારતના હવામાનમાં મોટો ફેરફાર: પહાડોમાં બરફ, મેદાનોમાં ગરમી વધી

ઉત્તર-પશ્ચિમ ભારતમાં હવામાન ફરી એકવાર બદલાયું છે. એક તરફ પહાડી વિસ્તારોમાં વરસાદ અને હિમવર્ષા થઈ રહી છે, તો બીજી તરફ મેદાની વિસ્તારોમાં તાપમાન ધીમે ધીમે વધી રહ્યું છે. હવામાન વિભાગે આગાહી કરી છે કે આ અઠવાડિયામાં ઉત્તર-પશ્ચિમ ભારતમાં ગરમીનો અહેસાસ વધુ વધશે. ,

હિમાચલ અને ઉત્તરાખંડમાં બરફવર્ષા

હિમાચલના ઊંચા પર્વતીય વિસ્તારોમાં તાજેતરમાં હળવી હિમવર્ષા નોંધાઈ છે. રોહતાંગ પાસ જેવા ઊંચા શિખરો પર બરફ પડતાં ઠંડી ફરી વધી ગઈ છે. કુલ્લુના નીચાણવાળા વિસ્તારોમાં હળવો વરસાદ પણ થયો હતો. તે જ રીતે ઉત્તરાખંડ ના પિથોરાગઢ જિલ્લામાં હિમાલયની ઊંચી ચોટીઓ તેમજ ગુંજી અને દરમા ખીણોમાં બરફવર્ષા થઈ. આ સિઝનમાં અનેક વખત બરફ પડતાં સ્થાનિક લોકો ફરીથી કડકડતી ઠંડીનો સામનો કરી રહ્યા છે. હવામાન વિભાગ મુજબ આગામી કેટલાક દિવસો સુધી ઊંચા વિસ્તારોમાં છૂટાછવાયા વરસાદ અથવા બરફવર્ષાની શક્યતા છે, ત્યારબાદ મહિનાના અંત સુધી મોટાભાગે શુષ્ક હવામાન રહેવાની ધારણા છે.

જમ્મુ-કાશ્મીરમાં વધતી ગરમી

જ્યાં પહાડોમાં ઠંડી વધી રહી છે, ત્યાં જમ્મુ-કાશ્મીરના કેટલાક વિસ્તારોમાં દિવસ દરમિયાન તાપમાન અસામાન્ય રીતે વધી રહ્યું છે. શ્રીનગરમાં મહત્તમ તાપમાન સામાન્ય કરતાં ઘણું વધારે નોંધાયું છે. આ તફાવત દર્શાવે છે કે પહાડી અને ખીણવાળા વિસ્તારોમાં હવામાનમાં સ્પષ્ટ ભિન્નતા જોવા મળી રહી છે.

રાજસ્થાન, પંજાબ અને હરિયાણા જેવા રાજ્યોમાં તાપમાન સતત વધી રહ્યું છે. ખાસ કરીને રાજસ્થાનમાં શુષ્ક હવામાનને કારણે દિવસ દરમિયાન ગરમી વધુ અનુભવાઈ રહી છે. હવામાન વિભાગે આગાહી કરી છે કે આગામી 48 કલાકમાં લઘુત્તમ અને મહત્તમ તાપમાનમાં 2 થી 3 ડિગ્રી સેલ્સિયસનો વધારો થઈ શકે છે. આ અઠવાડિયે મોટાભાગના મેદાની વિસ્તારોમાં આકાશ સ્વચ્છ અને હવામાન શુષ્ક રહેવાની સંભાવના છે.

પૂર્વ અને દક્ષિણ ભારતમાં વરસાદની શક્યતા

બંગાળની ખાડીમાં બનેલા નીચા દબાણના ક્ષેત્રના કારણે ઓડિશા, વેસ્ટ બંગાળ, મેઘાલય અને તેલંગણામાં છૂટાછવાયા વરસાદ અને વાવાઝોડાની શક્યતા છે. કેટલાક વિસ્તારોમાં વીજળી પડવાની અને 30 થી 40 કિમી પ્રતિ કલાકની ઝડપે પવન ફૂંકાવાની શક્યતા વ્યક્ત કરવામાં આવી છે. સાથે સાથે મધ્યપ્રદેશ, છત્તીસગઢ અને વિદર્ભના કેટલાક વિસ્તારોમાં પણ હળવો વરસાદ પડી શકે છે. 23 થી 26 ફેબ્રુઆરી દરમિયાન અંદામાન અને નિકોબારમાં પણ હળવો વરસાદ અને તેજ પવનની શક્યતા છે.