ગુજરાત પર વરસાદી સિસ્ટમ સક્રીય થવાના કારણે રાજ્યમાં લાંબા વિરામ બાદ ફરી એકવાર વરસાદી માહોલ જામ્યો

ગુજરાત પર વરસાદી સિસ્ટમ સક્રીય થવાના કારણે રાજ્યમાં લાંબા વિરામ બાદ ફરી એકવાર વરસાદી માહોલ જામ્યો છે. રાજ્યમાં આજે 15 જિલ્લાઓમાં વરસાદની આગાહી હવામાન વિભાગ દ્વારા કરવામાં આવી છે. તો બીજી તરફ છેલ્લા 24 કલાકમાં રાજ્યના 151 તાલુકાઓમાં વરસાદ નોંધાયો છે. જેમાં વલસાડના કપરાડામાં 5.5 ઈંચથી પણ વધુ વરસાદ ખાબક્યો છે.

રાજ્યમાં વલસાડના કપરાડામાં 5.5 ઈંચ, ડાંગના સુબિરમાં 5 ઈંચ, આહવામાં 4.4 ઈંચ, ધરમપુરમાં 4 ઈંચ, ખેરગામમાં 4 ઈંચ, અંકલેશ્વરમાં 3.5 ઈંચ, માંગરોળમાં 3 ઈંચ, મહેસાણામાં 2.5 ઈંચ, વાગરામાં 2.5 ઈંચ અને મહુવામાં 2.5 ઈંચ વરસાદ નોંધાયો છે. તો અમદાવાદ શહેરમાં સરેરાશ 1 ઈંચ જેટલો વરસાદ પડ્યો છે. રાજ્યના 66 તાલુકાઓમાં 1 ઈંચથી વધુ વરસાદ છેલ્લા 24 કલાકમાં નોંધાયો છે.

હવામાન વિભાગ મુજબ, ગુજરાતમાં શનિવારે વડોદરા, ભરૂચ, છોટા ઉદેપુર, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલીમાં ગાજવીજ સાથે ભારે વરસાદની આગાહી કરવામાં આવી છે. તો અરવલ્લી, મહિસાગર, પંચમહાલ, દાહોદ, અમરેલી, ગીર સોમનાથ અને ભાવનગર જિલ્લામાં પણ હળવાથી મધ્યમ વરસાદની આગાહી કરવામાં આવી છે.

અમદાવાદમાં વહેલી સવારથી જ વરસાદ વરસી રહ્યો છે. શહેરના બાપુનગર, નિકોલ, નરોડા, અમરાઈવાડી, વસ્ત્રાલ, ઓઢવ, વેજલપુર, બોપલ, શેલા, ઈસ્કોન, પ્રહલાદનગર, શ્યામલ, બોડકદેવ, પંચવટી સહિત તમામ વિસ્તારમાં વરસાદ છે. વહેલી સવારે આકાશમાં વીજળીના ચમકારા પણ થતા હતા. આજે નર્મદા, ડાંગ, સુરત, તાપી, નવસારી અને વલસાડમાં ભારેથી અતિભારે વરસાદ થઇ શકે છે. જ્યારે વડોદરા, દાહોદ, છોટાઉદેપુર અને ભરૂચમાં ભારે વરસાદ થવાની શક્યતા છે.