મહિલા અનામત બિલ અંગે ઓવૈસીએ વિપક્ષ પર નિશાન સાધ્યું, રાહુલ ગાંધીને પણ પડકાર આપ્યો

ઓલ ઈન્ડિયા મજલિસ-એ-ઈત્તેહાદુલ મુસ્લિમીન (AIMIM)ના વડા અસદુદ્દીન ઓવૈસીએ મહિલા અનામત બિલને લઈને વિપક્ષી પાર્ટીઓ પર જોરદાર નિશાન સાધ્યું છે. હૈદરાબાદમાં એક જાહેર સભામાં ઓવૈસીએ કહ્યું કે કોંગ્રેસ, સમાજવાદી પાર્ટી અને લાલુ યાદવની પાર્ટી (RJD)ના નેતાઓ સંસદમાં મુસ્લિમોનું નામ લેતા ડરે છે. મેં ઊભા થઈને કહ્યું કે મુસ્લિમ અને ઓબીસી મહિલાઓને પણ અનામત મળવું જોઈએ, તેઓ મને કહેતા રહે છે કે હું મહિલાઓની વિરુદ્ધ છું, પરંતુ સત્ય એ છે કે તમે મહિલાઓ, ઓબીસી અને મુસ્લિમોની વિરુદ્ધ છો. એઆઈએમઆઈએમના વડા અસદુદ્દીન ઓવૈસીએ કહ્યું કે ભાજપના નેતાઓ કહેતા રહે છે ‘અમારા બે સાંસદોએ મહિલા અનામત બિલની વિરુદ્ધમાં મતદાન કર્યું. બિલની તરફેણમાં 450 સાંસદોએ મતદાન કર્યું અને બિલની વિરુદ્ધમાં માત્ર 2 સાંસદોએ મતદાન કર્યું, જ્યારે સૌએ કહ્યું કે 450 સાંસદો મારી વિરુદ્ધમાં છે, ત્યારે મેં આખા દેશને બતાવ્યું કે કોંગ્રેસ અને ભાજપ એકસાથે છે, સમાજવાદી પાર્ટી અને કોંગ્રેસ પણ એકસાથે છે.

હૈદરાબાદમાં એક જાહેર રેલીને સંબોધતા ઓવૈસીએ બસપા સાંસદ દાનિશ અલી સાથે અભદ્ર વ્યવહારનો મુદ્દો પણ ઉઠાવ્યો અને કહ્યું કે અમે જોઈએ છીએ કે ભાજપના એક સાંસદ સંસદમાં મુસ્લિમ સાંસદને અપશબ્દ કહે છે. લોકો કહી રહ્યા છે કે તેમણે સંસદમાં ન બોલવું જોઈએ, તેઓ કહે છે કે તેમની જીભ ખરાબ હતી. આ તો જનતાના પ્રતિનિધિ છે જેમને તમે વોટ આપ્યો છે…એ દિવસ દૂર નથી જ્યારે દેશની સંસદમાં એક મુસ્લિમનું મોબ લિંચિંગ થશે…ક્યાં ગયો તમારો સૌનો સાથ, સૌનો વિકાસ?

આ અવસર પર ઓવૈસીએ કોંગ્રેસના પૂર્વ અધ્યક્ષ અને સાંસદ રાહુલ ગાંધીને પડકાર ફેંકતા કહ્યું કે હું તમારા નેતા (રાહુલ ગાંધી) ને વાયનાડથી નહીં પરંતુ હૈદરાબાદથી ચૂંટણી લડવાનો પડકાર ફેંકું છું. તમે મોટી – મોટી વાતો કરો છો, જમીન પર આવો મુકાબલો કરીશું. કોંગ્રેસના લોકો ઘણી વાતો કરશે, પરંતુ હું તૈયાર છું… જ્યારે બાબરી મસ્જિદ અને સચિવાલયની મસ્જિદ તોડી પાડવામાં આવી ત્યારે આ કોંગ્રેસ જ હતી.