બાઇકર્સ અને તોફાની વોટસએપ ગ્રુપ ચલાવનારા તત્વો સામે પોલીસ ફરિયાદ સરકારી જમીન પરથી કલેકટર ઢોરવાડા દુર કરાવશે

મનપામાં ગઇકાલે કલેકટર, કોર્પોરેશન, પોલીસ, આરટીઓ, પશુ પાલન વિભાગના પ્રતિનિધિઓની મળેલી મીટીંગ બાદ આજે રાત્રેથી જ સઘન ઢોર પકકડ ઝુંબેશ શરૂ કરી દેવામાં આવનાર છે. મનપામાં એએનસીડી વિભાગની ટીમો અને કાફલો વધારી દેવાયો છે તો પોલીસે પીએસઆઇ સહિતના સ્ટાફના ઓર્ડર કરી દેતા રખડતા ઢોર સામેનો નવો કાયદો કડકાઇથી લાગુ થઇ જશે તે નકકી બન્યું છે.

મ્યુનિ. કમિશનર આનંદ પટેલે જણાવ્યું હતું કે, હાઈકોર્ટ અને રાજ્ય સરકાર દ્વારા આપવામાં આવેલ દિશાનિર્દેશ અનુસાર જાહેર માર્ગો પર રખડતા પશુઓને કારણે સર્જાતી સમસ્યાઓના નિરાકરણ માટે આવા પશુઓ પકડવાની કામગીરી અસરકારક રીતે થાય તે માટે આજે વિવિધ સરકારી વિભાગોના અધિકારી દ્વારા જુદાજુદા મુદ્દાઓ અંગે પરામર્શ કરવામાં આવ્યો હતો.

જેમાં રખડતા પશુઓના મુદ્દા ઉપરાંત ટ્રાફિક, દબાણ અને સફાઈ કામગીરીની બાબતનો પણ સમાવેશ થાય છે. અત્યાર સુધીમાં મનપા 38 હજાર જેટલા રખડતા પશુઓ પકડી ચુકી છે અને ત્યારબાદ જરૂરી ઔપચારિક કામગીરી પણ પૂર્ણ કરવામાં આવેલ છે.

શહેરના મુખ્ય માર્ગો અને ચોક ખાતે લગાવવામાં આવેલા 950થી વધુ સીસીટીવી કેમેરાની મદદથી જાહેર માર્ગો પર બાજ નજર રાખી પોલીસ બંદોબસ્ત સાથે રખડતા પશુઓને પકડવાની કામગીરી કરવામાં આવશે. ટીમ રખડતા પશુઓ પકડવા નીકળે એ સાથે જ નંબર પ્લેટ વગરના બાઈક પર બેસી કેટલાક લોકો આ ટીમની ગતિવિધિઓ પર નજર રાખે છે.

આ ઉપરાંત એવું પણ જાણવામાં આવેલ છે કે, કોઈ ચોક્કસ સમૂહ દ્વારા વોટ્સએપ ગ્રુપમાં પણ અંગેની માહિતી શેર કરવામાં આવે છે. આમ વિવિધ પ્રકારે તંત્રની કામગીરીમાં જુદાજુદા સ્વરૂપે અડચણો ઉભી કરવાની આ પ્રકારની ચેષ્ટાને કારને રખડતા પશુઓ પકડવાની કામગીરી પર અસર થાય છે.

આ સમસ્યાનું નિરાકરણ લાવવા માટે, નંબર પ્લેટ વગરના બાઈક ચાલકો અને વોટ્સએપ ગ્રુપ ચલાવતા લોકો વિરૂધ્ધ એફ.આઈ.આર. જેવી કાયદેસરની કડક કાર્યવાહી કરવામાં આવશે.

સરકારી જમીનો કે રેલ્વે તંત્રની જમીનો પર પશુઓ રાખવામાં ન આવે તે સુનિશ્ચિત કરવા માટે જિલ્લા કલેકટર તંત્ર, રેલ્વે અને પોલીસ ડીપાર્ટમેન્ટ સાથે સંકલન કરવામાં આવેલ છે.બીજી તરફ ફરજમાં રૂકાવટ કરનારા સામે પીએસઆઇ કક્ષાના અધિકારી જાતે ફરિયાદી બનીને ગુનો દાખલ કરાવશે તેવું જાણવા મળ્યું છે.

મનપા અને પોલીસ દ્વારા ઢોરનો ત્રાસ દુર કરવા સઘન કામ શરૂ થવાનું છે ત્યારે 36 જેટલા પોઇન્ટ પર ઢોરનો કાયમી ત્રાસ હોવાનો રીપોર્ટ મહાપાલિકાના રેકર્ડ પર રહેલો છે. જેમાં સૌથી વધુ ન્યુસન્સ પોઇન્ટ વોર્ડ નં.રમાં હોવાનું જાણવા મળ્યું છે.

ધારાસભ્ય, સ્ટે.ચેરમેન અને શાસક પક્ષ દંડક જે વોર્ડમાં ચૂંટાયા છે ત્યાં અનેક જગ્યાએ ઢોરવાડા થઇ ગયા છે. ગીત ગુર્જરી સોસાયટી, ભોમેશ્ર્વરમાં પોલીસ હેડ કવાર્ટરની દિવાલ, એરપોર્ટ ફાટકથી ભોમેશ્વર તરફનો રસ્તો, સાંઢીયા પુલ વોંકળા પાસે, બજરંગવાડી સર્કલથી આગળ જેવા સ્થળોએ કાયમી ઢોર રહે છે. આવા 18 વોર્ડનું નાનુ મોટુ લીસ્ટ મનપાએ હાથ પર લીધુ છે.