આતંકી પન્નૂ પર NIAએ દાખલ કર્યો કેસ, એર ઇન્ડિયાના મુસાફરોને આપી હતી ધમકી

ખાલિસ્તાન સમર્થક હરદીપ સિંહ નિજ્જરની હત્યાને લઈને ભારત અને કેનેડા વચ્ચે વિવાદ ચાલુ છે. દરમિયાન, NIA એ સોમવાર (20 નવેમ્બર) ના રોજ શીખ ફોર જસ્ટિસ (SFJ) ના સ્થાપક ગુરપતવંત સિંહ પન્નુ વિરુદ્ધ એર ઈન્ડિયાના મુસાફરોને ધમકી આપવા બદલ કેસ નોંધ્યો હતો.

NI એ આતંકવાદી પન્નુ વિરુદ્ધ IPCની કલમ 120B, 153A અને 506 હેઠળ કેસ નોંધ્યો છે. આ સિવાય ગેરકાનૂની પ્રવૃત્તિઓ (પ્રિવેન્શન) એક્ટની કલમ 10, 13, 16, 17, 18, 18B અને 20 હેઠળ પણ કેસ દાખલ કરવામાં આવ્યો છે.વાસ્તવમાં પન્નુનો એક વીડિયો તાજેતરમાં સામે આવ્યો હતો. જેમાં તેણે 19મી નવેમ્બરે એર ઈન્ડિયાની ફ્લાઈટમાંથી આવતા મુસાફરોને ધમકી આપી હતી.

તાજેતરમાં ભારત અને અમેરિકા વચ્ચે મંત્રી સ્તરીય વાટાઘાટો બાદ વિદેશ સચિવ વિનય ક્વાત્રાએ કેનેડાનો ઉલ્લેખ કરતા કહ્યું હતું કે, અમારી મુખ્ય ચિંતા સુરક્ષા છે. તમે તાજેતરમાં ગુરપતવંત સિંહ પન્નુનો વીડિયો જોયો જ હશે. આ ગંભીર સુરક્ષા ચિંતાઓ કરે છે. અમે અમારી સ્થિતિ ખૂબ જ સ્પષ્ટ કરી છે. અમને લાગે છે કે તેઓ તે સમજે છે.” નોંધનીય છે કે ભારત કેનેડા સરકાર પાસે પન્નુ અને અન્ય ખાલિસ્તાનીઓ વિરુદ્ધ કાર્યવાહી કરવાની માંગ કરી રહ્યું છે.

કેનેડાના વડા પ્રધાન જસ્ટિન ટ્રુડોએ તાજેતરમાં દાવો કર્યો હતો કે નિજ્જરની હત્યામાં કોઈ ભારતીય એજન્ટ સામેલ હોઈ શકે છે. ભારત સરકારે આ આરોપને નકારી કાઢ્યા અને કહ્યું કે ટ્રુડો રાજકીય રીતે પ્રેરિત આવા નિવેદનો કરી રહ્યા છે. ટ્રુડોના નબાદ ભારત અને કેનેડા વચ્ચે વિવાદ ચાલી રહ્યો છે.