માર્કેટમાં મંદીને કારણે ગુજરાતનાં નવાં ઇક્વિટી રોકાણકારોની નોંધણી છ મહિનાની સૌથી નીચી સપાટીએ પહોંચી છે ,

માર્કેટમાં મંદીને કારણે ગુજરાતનાં નવાં ઇક્વિટી રોકાણકારોની નોંધણી છ મહિનાની સૌથી નીચી સપાટીએ પહોંચી છે. નવેમ્બર 2024માં, ગુજરાતમાં 1.26 લાખ નવાં રોકાણકારો નોંધાયાં હતાં, જે ઑક્ટોબરની સરખામણીએ લગભગ 38 ટકાનો ઘટાડો દર્શાવે છે, અને છ મહિનાની સૌથી નીચી સપાટી છે.

નેશનલ સ્ટોક એક્સચેન્જના ડેટા અનુસાર, રાષ્ટ્રીય સ્તરે, 15.2 લાખ નવી નોંધણી સાથે નવેમ્બરમાં નવાં રોકાણકારોની નોંધણી સાત મહિનાની નીચી સપાટીએ નોંધાઈ છે. છેલ્લાં ત્રણ મહિનામાં બીએસઈ સેન્સેક્સ 8.58 ટકા ઘટીને 78472 પોઈન્ટ પર અને એનએસઈ નિફ્ટી 9.41 ટકા ઘટીને 23750 પોઈન્ટ પર હતો.

રીપોર્ટ અનુસાર “ઇક્વિટી બજારોમાં વેચવાલી અને આર્થિક વૃદ્ધિમાં મંદીની ચિંતા અને અપેક્ષિત- કરતાં નબળી જીડીપી વૃદ્ધિના પરિણામે છેલ્લાં કેટલાક મહિનામાં નવાં રોકાણકારોના ઉમેરામાં ઘટાડો થયો છે. નવાં રોકાણકારોની નોંધણી નવેમ્બરમાં મહિને-દર-મહિને 15.2 ટકા ઘટીને 15.2 લાખની સૌથી નીચી સપાટીએ છે.

અહેવાલ મુજબ, ઘટાડો થયો હોવા છતાં, ઉત્તર પ્રદેશ નવાં રોકાણકારોની નોંધણીમાં અગ્રેસર છે, જેમાં 2.1 લાખ નવાં રજિસ્ટ્રેશન નોંધાયા છે, અને સમગ્ર નવી નોંધણીઓમાં 13.7 ટકાનો હિસ્સો ધરાવે છે. મહારાષ્ટ્ર 1.9 લાખ નવાં રોકાણકારો સાથે બીજા ક્રમે છે, જેમાં નવાં રોકાણકારોનો હિસ્સો ઘટીને 22.7 ટકા થયો છે, જ્યારે ગુજરાત 1.3 લાખ નવાં રોકાણકારો સાથે ત્રીજા ક્રમે છે.

સ્ટોક બ્રોકિંગ ફર્મના ડિરેક્ટર ગુંજન ચોક્સીએ જણાવ્યું હતું કે, “ભારતીય શેરબજારોમાં મંદીનો ટ્રેન્ડ જોવા મળી રહ્યો છે, અને તેનાથી નવાં રોકાણકારોની નોંધણી તેમજ રિટેલ રોકાણકારોની સક્રિય બજારમાં ભાગીદારી પર અસર થઈ છે. કુલ રોકાણકારો હવે લગભગ 11 કરોડ સુધી પહોંચી ગયાં છે. દેશમાં કોવિડ પછી નવાં ઇક્વિટી રોકાણકારોનો ધસારો જોવા મળ્યો છે.