ભારતના વાણિજ્ય મંત્રી પિયુષ ગોયલે જણાવ્યું હતું કે ભારત અને અમેરિકા વચ્ચે વેપાર કરાર માટે વાતચીત ચાલી રહી છે.

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા વિશ્વભરના અનેક દેશો પર ટેરિફ લાદવાની જાહેરાત વચ્ચે, ભારતના વાણિજ્ય મંત્રી પિયુષ ગોયલે જણાવ્યું હતું કે ભારત અને અમેરિકા વચ્ચે વેપાર કરાર માટે વાતચીત ચાલી રહી છે. તેમણે સ્પષ્ટતા કરી કે ભારતના હિતો સર્વોપરી રહેશે અને કોઈપણ દબાણ હેઠળ વાતચીત કરવામાં આવશે નહીં.

પિયુષ ગોયલે જણાવ્યું “મેં પહેલા પણ ઘણી વાર કહ્યું છે કે અમે બંદૂકની અણીએ સોદા કરતા નથી. સમયરેખા સારી છે કારણ કે તે વાટાઘાટોને ઝડપી બનાવે છે, પરંતુ જ્યાં સુધી આપણે દેશ અને લોકોના હિતોનું રક્ષણ કરવામાં સક્ષમ ન હોઈએ ત્યાં સુધી કોઈ પણ બાબતમાં ઉતાવળ કરવી યોગ્ય નથી.

કેન્દ્રીય મંત્રીનું આ નિવેદન અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ચીન સિવાય તમામ દેશો પર પારસ્પરિક ટેરિફ લાદવાની જાહેરાત કર્યા બાદ આવ્યું છે. હવે ચીન પર ૧૪૫ ટકા ડ્યુટી લાદવામાં આવશે. ભારત સહિત 75 દેશોને હવે ટેરિફમાંથી 90 દિવસની રાહત મળી છે.

ભારત અને અમેરિકા સપ્ટેમ્બર-ઓક્ટોબર સુધીમાં તેમના વેપાર સોદાના પ્રથમ તબક્કાને અંતિમ સ્વરૂપ આપવાનું લક્ષ્ય રાખે છે, અને 2030 સુધીમાં દ્વિપક્ષીય વેપાર વર્તમાન $191 બિલિયનથી વધારીને $500 બિલિયન કરવાની યોજના ધરાવે છે.

વ્હાઇટ હાઉસ ખાતે વડા પ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ વચ્ચે તાજેતરમાં થયેલી મુલાકાત બાદ ભારત અને વોશિંગ્ટન 2025ના સપ્ટેમ્બર-ઓક્ટોબર સુધીમાં દ્વિપક્ષીય વેપાર કરારના પ્રથમ તબક્કા પર વાટાઘાટો પૂર્ણ કરવા સંમત થયા છે. ભારત-યુરોપિયન યુનિયન (EU) વેપાર સોદા અંગે ગોયલે કહ્યું કે વાટાઘાટો ત્યારે જ આગળ વધે છે જ્યારે બંને પક્ષો એકબીજાની ચિંતાઓ અને જરૂરિયાતો પ્રત્યે સંવેદનશીલ હોય.

કેન્દ્રીય મંત્રી ગોયલે કહ્યું, “હું ફક્ત એટલું જ કહી શકું છું કે બધી વેપાર વાટાઘાટો ‘ભારત પ્રથમ’ ની ભાવના અને વિકસિત ભારત 2047 તરફ સારી રીતે આગળ વધી રહી છે. મુક્ત વેપાર કરારને વહેલી તકે પૂર્ણ કરવા માટે નક્કર પગલાં લેવાની જરૂર છે.