પહેલગામ હુમલા પછી ભારતે લીધેલા કડક પગલાંથી હતાશ પાકિસ્તાન સતત ઉશ્કેરણીજનક પ્રવૃત્તિઓ કરી રહ્યું છે. બુધવારે પણ પાકિસ્તાની સૈનિકો એ નિયંત્રણ રેખા (LoC) પર ગોળીબાર કર્યો.

પહેલગામ હુમલા પછી ભારતે લીધેલા કડક પગલાંથી હતાશ પાકિસ્તાન સતત ઉશ્કેરણીજનક પ્રવૃત્તિઓ કરી રહ્યું છે. બુધવારે પણ પાકિસ્તાની સૈનિકો એ નિયંત્રણ રેખા (LoC) પર ગોળીબાર કર્યો. પાકિસ્તાની સેના નિયંત્રણ રેખા પર વારંવાર યુદ્ધવિરામનું ઉલ્લંઘન કરી રહી છે. પાકિસ્તાન સીમા પર અશાંતિ અને અરાજકતા ફેલાવીને દુનિયાનું ધ્યાન પહેલગામ હુમલાથી ભટકાવવા માંગે છે. ભારતીય સેનાના જણાવ્યા અનુસાર 29-30 એપ્રિલની રાત્રે પાકિસ્તાની સેનાની ચોકીઓએ જમ્મુ અને કાશ્મીરના કેન્દ્રશાસિત પ્રદેશના નૌશેરા, સુંદરબની અને અખનૂર સેક્ટરમાં નિયંત્રણ રેખા પાર નાના હથિયારોથી કોઈ ઉશ્કેરણી વિના ગોળીબાર શરૂ કર્યો. જેનો ભારતીય સેનાના સૈનિકોએ યોગ્ય રીતે જવાબ આપ્યો છે.

શરૂઆતમાં પાકિસ્તાને ઉત્તર કાશ્મીરમાં આ પોતાની પ્રવૃત્તિ ચાલુ રાખી હતી પરંતુ હવે તેણે જમ્મુના અખનૂર સેક્ટર સુધી ગોળીબારની રેન્જ વધારી દીધી છે. આવી સ્થિતિમાં છેલ્લા છ દિવસથી પાકિસ્તાની સેના સમગ્ર નિયંત્રણ રેખા પર શાંતિ ખલેલ પહોંચાડવાનો પ્રયાસ કરી રહી છે. ભારતીય સેના પાકિસ્તાનને જડબાતોડ જવાબ આપી રહી છે. મંગળવારે રાત્રે પણ પાકિસ્તાને ફરી એકવાર અખનૂરના પરગલ વિસ્તારમાં ગોળીબાર કર્યો હતો. સોમવારે રાત્રે પણ પાકિસ્તાની સેનાએ બારામુલ્લા અને કુપવાડાથી ઉત્તર કાશ્મીરના અખનૂર સેક્ટર સુધી વચ્ચે-વચ્ચે ગોળીબાર કર્યો હતો.

પાકિસ્તાન સરહદોને અશાંત બતાવીને પહેલગામના દુર્ઘટના પરથી વિશ્વનું ધ્યાન હટાવવાનો પ્રયાસ કરી રહ્યું છે. જમ્મુના પીઆરઓ ડિફેન્સ લેફ્ટનન્ટ કર્નલ સુનિલ બટવાલે જણાવ્યું હતું કે સોમવારે રાત્રે પાકિસ્તાની સેનાએ કુપવાડા અને બારામુલ્લા જિલ્લાઓ તેમજ અખનૂર સેક્ટરમાં નિયંત્રણ રેખા પર નાનાથી મધ્યમ હથિયારોથી ગોળીબાર કર્યો હતો. તેમણે જણાવ્યું હતું કે પાકિસ્તાને પૂંછ સેક્ટરમાં પણ ગોળીબાર કર્યો હતો. તેમણે કહ્યું કે પાકિસ્તાની સૈનિકોએ નિયંત્રણ રેખા પર સતત યુદ્ધવિરામનું ઉલ્લંઘન કર્યું છે. સૂત્રોના જણાવ્યા અનુસાર હાલમાં સેનાની 15મી અને 16મી કોર્પ્સના ફિલ્ડ કમાન્ડરો નિયંત્રણ રેખા પર સેનાની ઓપરેશનલ તૈયારીઓ પર નજીકથી નજર રાખી રહ્યા છે.