નાઇજીરીયામાં બોટ પલટી જતાં 25ના મોત અને અનેક લોકો ગુમ ; 100 મુસાફરો સવાર હતા, 26 ને બચાવી લેવામાં આવ્યા

ઉત્તર-મધ્ય નાઇજીરીયાના નાઇજર રાજ્યમાં શનિવારે લગભગ 100 મુસાફરોને લઈ જતી એક બોટ પલટી ગઈ હતી, જેમાં 25 લોકોના મોત થયા હતા અને ડઝનેક લોકો ગુમ થયા હતા, એમ અધિકારીઓએ રવિવારે જણાવ્યું હતું.

રાષ્ટ્રીય કટોકટી વ્યવસ્થાપન એજન્સીના અધિકારી ઇબ્રાહિમ હુસૈનીએ જણાવ્યું હતું કે, નાઇજર રાજ્યના શિરોરો વિસ્તારમાં ગુમુ ગામ નજીક શનિવારે આ અકસ્માત થયો હતો.

તેમણે કહ્યું કે, શોધ અને બચાવ કામગીરી ચાલુ છે પરંતુ મર્યાદિત છે કારણ કે આ વિસ્તાર મોટાભાગે સશસ્ત્ર ગેંગ દ્વારા નિયંત્રિત છે. તેમણે ઉમેર્યું હતું કે, જાનહાનિની સંખ્યા વધી શકે છે.

દરમિયાન, નાઇજર સ્ટેટ ઇમરજન્સી મેનેજમેન્ટ એજન્સીના અધિકારી યુસુફ લેમુએ જણાવ્યું હતું કે, હોડીમાંથી 26 લોકોને બચાવી લેવામાં આવ્યા છે. તેમાંના મોટા ભાગના મહિલાઓ અને બાળકો છે.

સ્થાનિક અધિકારી ઇશિયાકુ અકિલુએ જણાવ્યું હતું કે, અકસ્માતનું ચોક્કસ કારણ હજુ સુધી જાણી શકાયું નથી, પરંતુ બધા સંકેતો સૂચવે છે કે તે ઓવરલોડિંગને કારણે થયું હતું. બોટ ડ્રાઇવર્સ યુનિયનના સભ્ય આદમુ અહેમદે પુષ્ટિ આપી હતી કે બોટ ઓવરલોડ હતી.

સશસ્ત્ર જૂથો, જેને સામાન્ય રીતે ડાકુ કહેવામાં આવે છે, તાજેતરના મહિનાઓમાં ઉત્તર-મધ્ય પ્રદેશમાં હુમલાઓ વધાર્યા છે, જેના કારણે બચાવ કામગીરી જટિલ બની છે.

તે જ સમયે, આ અકસ્માત નાઇજીરીયાના જળમાર્ગો પર જીવલેણ બોટ અકસ્માતોની શ્રેણીમાં નવીનતમ છે, જ્યાં દૂરના વિસ્તારોમાં, ખાસ કરીને વરસાદની મોસમ દરમિયાન, ઓવરલોડેડ અને નબળી જાળવણીવાળા જહાજોને કારણે અકસ્માતો સામાન્ય છે.