લોકસભા ચૂંટણીમાં ભાજપની રણનીતિ માટે ચાર રાજ્યો કર્ણાટક, રાજસ્થાન, હરિયાણા અને બિહારના રાજકીય અને સામાજિક સમીકરણો ખૂબ જ મહત્વપૂર્ણ

લોકસભા ચૂંટણીને લઈ BJP એક્શન મોડમાં છે. આ દરમિયાન લોકસભા ચૂંટણીમાં ભાજપની રણનીતિ માટે ચાર રાજ્યો કર્ણાટક, રાજસ્થાન, હરિયાણા અને બિહારના રાજકીય અને સામાજિક સમીકરણો  ખૂબ જ મહત્વપૂર્ણ છે. આ રાજ્યોમાં ભાજપને માત્ર પોતાના આંતરિક મામલાઓથી જ નિપટવાનું નથી પરંતુ ઘણી બેઠકો પર વિપક્ષ તરફથી પડકારની પણ શક્યતા છે. આ રાજ્યોમાં છેલ્લી ચૂંટણીમાં BJP અને NDAને મોટી સફળતા મળી હતી. છેલ્લી લોકસભા ચૂંટણીમાં જ્યારે ભાજપે 300નો આંકડો પાર કર્યો હતો ત્યારે પાર્ટી અને તેના ગઠબંધનને આ ચાર રાજ્યોમાં 103માંથી 99 બેઠકો મળી હતી અને માત્ર ચાર જ બેઠકો વિપક્ષના ખાતામાં ગઈ હતી. BJP આ આંકડો આ ચૂંટણીમાં પણ રિપીટ કરવા માંગે છે. પરંતુ ટિકિટ વહેંચણી, બહારથી આવતા નેતાઓને ટિકિટ આપવી, નવા સાથી પક્ષો અને વિપક્ષની રણનીતિ જેવા મુદ્દાઓનો સામનો કરવો પડશે.

બિહારમાં છેલ્લી ચૂંટણીમાં ભાજપના નેતૃત્વમાં NDA એ 40માંથી 39 બેઠકો જીતી હતી. આ વખતે પણ BJPનું એ જ પ્રકારનું ગઠબંધન છે. આમાં વધુ બે પક્ષો પણ સામેલ છે. જો કે આ દરમિયાન આરજેડી પણ ઘણી મજબૂત બની છે. સામાજિક જ્ઞાતિ સમીકરણ અહીં ખૂબ મહત્વનું છે. આરજેડી અને તેના સાથી પક્ષો કેટલીક સીટો પર સખત પડકાર આપી શકે છે.

કર્ણાટક BJP માટે સૌથી મોટી સમસ્યા છે. છેલ્લી સામાન્ય ચૂંટણીમાં ભાજપે 28માંથી 25 બેઠકો જીતી હતી. જોકે વિધાનસભાની ચૂંટણીમાં તેને કોંગ્રેસ તરફથી કારમી હારનો સામનો કરવો પડ્યો હતો. આ સામાન્ય ચૂંટણીમાં ભાજપે જેડી(એસ) સાથે ગઠબંધન કર્યું છે જેથી સામાજિક સમીકરણને સરળ બનાવી શકાય. જેડી(એસ)ના નેતા ભૂતપૂર્વ વડાપ્રધાન એચડી દેવગૌડા વોક્કાલિગા સમુદાયમાંથી આવે છે અને આ સમુદાય પર તેમનો ઘણો પ્રભાવ છે, બીજી તરફ બીએસ યેદિયુરપ્પાને કારણે રાજ્યના પ્રભાવશાળી લિંગાયત સમુદાયને BJP સમર્થક માનવામાં આવે છે. જો કે કર્ણાટકમાં કોંગ્રેસની સરકાર બન્યા બાદ પરિસ્થિતિ બદલાઈ ગઈ છે. નાયબ મુખ્યમંત્રી ડીકે શિવકુમાર વોક્કાલિગા સમુદાયના અસરકારક નેતા તરીકે ઉભરી આવ્યા છે. આવી સ્થિતિમાં JD(S) સાથે જવાથી ભાજપને કેટલો ફાયદો થશે તે અંગે શંકા છે. આ ઉપરાંત સદાનંદ ગૌડા, અનંત હેગડે અને નલિન કાતિલ જેવા તેના વર્તમાન સાંસદોની ટિકિટ કાપવાને લઈને ભાજપમાં અસંતોષ છે.

ભાજપે ગત વખતે હરિયાણામાં તમામ 10 બેઠકો જીતી હતી. પાર્ટીએ હાલમાં જ મુખ્યમંત્રી બદલીને પોતાની રણનીતિ બદલી છે, જોકે અહીં હરીફાઈ કપરી હોઈ શકે છે. પાર્ટીએ કુરુક્ષેત્રમાં કોંગ્રેસના નવીન જિંદાલ, સિરસામાં અશોક તંવર અને તાજેતરમાં પાર્ટીમાં જોડાયેલા રણજીત ચૌટાલાને હિસારમાં ટિકિટ આપી છે. જેના કારણે પાર્ટીમાં નારાજગી જોવા મળી રહી છે.