આંધ્રપ્રદેશના સીએમ ચંદ્રબાબુ નાયડુનો ચમત્કારિક બચાવ થયો , સુરક્ષા ગાર્ડે તરત બચાવ્યાં

પૂરગ્રસ્ત વિસ્તારોની મુલાકાત લેવા આવેલા આંધ્રપ્રદેશના મુખ્યમંત્રી એન ચંદ્રબાબુ નાયડુ મોટી દુર્ઘટનાનો શિકાર બનતા બચી ગયા હતા. રાહતની વાત છે કે આ દરમિયાન કોઈને ઈજા થઈ નથી. ટ્રેન નાયડુની ખૂબ નજીકથી પસાર થઈ હતી અને તેઓ થોડા ઈંચથી બચી ગયાં હતા. ભારે વરસાદને કારણે આંધ્રપ્રદેશના ઘણા વિસ્તારોમાં પૂર જેવી સ્થિતિ છે. સીએમ નાયડુએ હાલમાં જ અધિકારીઓ સાથે આ મુદ્દે ચર્ચા કરી છે.

સીએમ નાયડુ ગુરુવારે પૂર પ્રભાવિત વિસ્તારોની સમીક્ષા કરી રહ્યા હતા. તે દરમિયાન તે મધુરા નગર રેલવે બ્રિજ પર હતા. ખાસ કરીને માત્ર રેલ ટ્રાફિક માટે બનાવવામાં આવેલા બ્રિજ પર ચાલવા માટે બહુ ઓછી જગ્યા છે. હવે આવી સ્થિતિમાં નાયડુ પાટા પાસે ચાલવા લાગ્યા અને તે જ ટ્રેક પર અચાનક એક ટ્રેન આવી પહોંચી. સ્થળ પર હાજર સતર્ક સુરક્ષા કર્મચારીઓએ તરત જ નાયડુને પાટા પરથી ખેંચી લીધા અને ટ્રેન નજીકથી પસાર થઈ ગઈ. સીએમ નાયડુ માત્ર થોડા ઇંચથી બચી ગયા હતા. ખાસ વાત એ છે કે છેલ્લા 5 દિવસથી પૂર પ્રભાવિત વિસ્તારોની મુલાકાત લઈ રહેલા નાયડુ ઘણી વખત સુરક્ષા પ્રોટોકોલ તોડતા જોવા મળ્યા છે. આ દરમિયાન તે ઘૂંટણ સુધીના પાણીમાં ગયો અને NDRF બોટ પર ચઢતાં જોવા મળ્યાં હતા.

મુખ્યમંત્રીએ ગુરુવારે વિજયવાડાના નાના રેલ્વે બ્રિજ પરથી પૂરની સ્થિતિનું મૂલ્યાંકન કર્યું. આ દરમિયાન ઘણા અધિકારીઓ અને NSG કમાન્ડો પણ તેમની સાથે હતા. નિરીક્ષણ દરમિયાન, નાયડુ બ્રિજની રેલિંગ પાસેના એક સાંકડા પ્લેટફોર્મ પર કોઈ ડર વિના ઊભા રહ્યા કારણ કે એક ટ્રેન ઝડપથી પસાર થઈ રહી હતી. ટ્રેનમાં મુસાફરી કરી રહેલા મુસાફરોએ મુખ્યમંત્રીની કામગીરીને બિરદાવી હતી. આંધ્રપ્રદેશમાં પૂરના કારણે 1.8 લાખ હેક્ટર વિસ્તારમાં પાક નાશ પામ્યો છે. પ્રારંભિક અંદાજ મુજબ બે લાખ ખેડૂતો આનાથી પ્રભાવિત થયા છે.