હરિયાણા સરકારે આગામી તા. 31ના રોજ ઇદના તહેવારની જાહેર રજા રદ્દ કરીને તેને મર્યાદિત વૈકલ્પિક રજા તરીકે જાહેર કરતા વિવાદ .

હરિયાણા સરકારે આગામી તા. 31ના રોજ ઇદના તહેવારની જાહેર રજા રદ્દ કરીને તેને મર્યાદિત વૈકલ્પિક રજા તરીકે જાહેર કરતા વિવાદ છેડાયો છે અને રાજયમાં મુસ્લિમ ધારાસભ્યોએ વિધાનસભામાં પણ આ મુદ્દે આક્રોશ ઠાલવ્યો હતો.

સરકારી જાહેર રજામાં તમામ સરકારી વિભાગો, શૈક્ષણિક સંસ્થાઓ, જાહેર સાહસો વગેરે રજા પાડે છે પરંતુ વૈકલ્પિક મર્યાદિત રજામાં આ રીતે રજા મળતી નથી પણ મુસ્લિમ સમુદાય કે જેને સંદર્ભમાં ઇદનો તહેવાર મહત્વનો છે તેમને એક દિવસની રજા આપવામાં આવે છે. હરિયાણા સરકારે આ સંદર્ભમાં એક જાહેરનામાથી ઇદને વૈકલ્પિક રજામાં મુકી દીધી હતી. આ પ્રકારની રજા ચોકકસ સમુદાયના ધાર્મિક અને સાંસ્કૃતિક પર્વ નિમિતે આપવામાં આવે છે અને તે લેવી કે ન લેવી તે જે તે સમુદાયના કર્મચારી પોતે નિશ્ચિત કરી શકે છે.

જોકે આ રજા ફરજીયાત નથી પણ તે રજાનો પગાર ચોકકસપણે મળે છે. મુખ્યસચિવ અનુરાગ રસ્તોગીએ તા. 31 માર્ચ બેન્ક કલોઝીંગ ડે હોય તે દિવસે બેન્કો પણ ચાલુ રહેવાની છે તેવું જણાવીને આ રજાને મર્યાદિત રજા જાહેર કરી છે. જોકે આ જાહેરનામુ જાન્યુઆરી માસમાં જ બહાર પડી ગયું હતું.

હરિયાણામાં 6 ટકા એટલે કે 18 લાખ જેટલા મુસ્લિમ સમુદાયના મતદારો પણ છે અને છ વિધાનસભા બેઠક પર રાજકીય પ્રભુત્વ ધરાવે છે. ગત ચૂંટણીમાં રાજયમાં પાંચ મુસ્લિમ ધારાસભ્યો ચૂંટાયા હતા જે તમામ કોંગ્રેસના છે અને આથી જ આ પ્રકારે વૈકલ્પિક રજા જાહેર કરી હોવાનું વિપક્ષે આક્ષેપ કર્યો છે