વડાપ્રધાનના હસ્તે દુનિયાના સૌથી ઉંચા ચિનાબ રેલવે બ્રિજનું ઉદઘાટન, વંદેભારત ટ્રેનને લીલીઝંડી ,

ઓપરેશન સિંદુર બાદ વડાપ્રધાન મોદી આજે પહેલીવાર જમ્મુ એન્ડ કાશ્મીરની મુલાકાતે આવ્યા છે, જેને લઈને સુરક્ષાની ચુસ્ત વ્યવસ્થા કરવામાં આવી હતી. આજે તેમના હસ્તે 272 કિલોમીટર લાંબી રેલલાઈન વાળા ઉધમપુર-શ્રીનગર બારામુલા રેલ લિંક પ્રોજેકટ અંતર્ગત બનાવવામાં આવેલ દુનિયા સૌથી ઉંચા ચિનાબ રેલવે બ્રિજ અને ભારતના પ્રથમ કેબલ સ્ટેટ બ્રિજનો શુભારંભ કરેલ.

આ સાથે જ વડાપ્રધાન મોદીએ આ રૂટ પર વંદેભારત ટ્રેનને પણ લીલીઝંડી દેખાડીને રવાના કરેલ. આ સાથે જ દેશના રેલમાર્ગને કાશ્મીરથી કન્યાકુમારી સુધી જોડવાનું સપનુ પુરુ થયું હતું.

વડાપ્રધાન મોદી જમ્મુ-કાશ્મીરમાં પહેલગામની બેસરન ખીણમાં 22 એપ્રિલે આતંકી હુમલો અને પછી પાકિસ્તાન સામે ઓપરેશન સિંદુર અંતર્ગત થયેલી સૈન્ય કાર્યવાહી બાદ પહેલીવાર કાશ્મીરમાં આવ્યા છે.

વડાપ્રધાનની સુરક્ષાને ધ્યાનમાં રાખીને સમગ્ર જમ્મુ-કાશ્મીર પ્રશાસન એલર્ટ મોડમાં હતુ. ખાસ કરીને વડાપ્રધાનના કાર્યક્રમ સ્થળો અને તેની આસપાસના કાર્યક્રમ સ્થળોમાં સેના બીએસએફ, જમ્મુ-કાશ્મીર પોલીસ, સીઆરપીએફે સુરક્ષાની ખાસ વ્યવસ્થા કરી છે.

પુલ પર મોદીની પગપાળા મુલાકાતને લઈને સુરક્ષાના ખૂબ જ પુખ્ત વ્યવસ્થા કરાઈ હતી. 30થી વધુ તેજતર્રાર કમાન્ડો તૈનાત હતા. વડાપ્રધાનની યાત્રા પુરી થાય ત્યાં સુધી પુરા વિસ્તારની સેટેલાઈટથી વોચ રાખવામાં આવી હતી.

આ યાત્રા દરમિયાન સેનાની તમામ એન્ટીમિસાઈલ અને અન્ય સુરક્ષાની વ્યવસ્થા એકટીવ મોડમાં રખાઈ હતી. આ કડક વ્યવસ્થાનું કારણ પાકિસ્તાન સાથે તનાવ છે. ઉદઘાટન બાદ પીએમે એક જાહેર કાર્યક્રમને સંબોધન કરેલ અહીં તેમણે 46 હજાર કરોડ રૂપિયાના વિકાસ કાર્યોની ભેટ આપી.