કર્ણાટકમાં ભાજપના ધારાસભ્ય બસનાગૌડા પાટીલ યાત્નાલે બળવાખોર વલણ અપનાવ્યું છે , પક્ષમાંથી હકાલપટ્ટી કરી તો કરોડોના કૌભાંડ ખુલ્લા પાડીશ

કર્ણાટકમાં ભાજપના ધારાસભ્ય બસનાગૌડા પાટીલ યાત્નાલે બળવાખોર વલણ અપનાવ્યું છે. રાજ્યની વિજયપુર સીટના ધારાસભ્ય યત્નાલે પોતાની જ પાર્ટીને ચેતવણી આપી છે અને કહ્યું છે કે, જો તેમને પાર્ટીમાંથી હાંકી કાઢવામાં આવશે તો તેઓ એવા લોકોના નામ સામે લાવશે જેમણે પૈસા લૂંટ્યા અને ઘણી સંપત્તિઓ બનાવી. બીએસ યેદિયુરપ્પાની સરકાર દરમિયાન 40 હજાર કરોડ રૂપિયાની ઉચાપત કરવામાં આવી છે. તે લોકોએ દરેક કોરોના દર્દી માટે 8 થી 10 લાખ રૂપિયાનું બિલ બનાવ્યું.

પાટીલે વધુમાં કહ્યું કે, તે સમયે અમારી સરકાર હતી. યેદિયુરપ્પા સરકારે કોરોના મહામારી દરમિયાન 45 રૂપિયાના માસ્કની કિંમત 485 રૂપિયા રાખી હતી. બેંગલુરુમાં 10 હજાર પથારીની વ્યવસ્થા કરવામાં આવી હતી. આ માટે 10 હજાર બેડ ભાડે આપવાનો ઓર્ડર આપવામાં આવ્યો હતો. જ્યારે મને કોરોનાનો ચેપ લાગ્યો ત્યારે મણિપાલ હોસ્પિટલે 5 લાખ 80 હજાર રૂપિયા માંગ્યા હતા. ગરીબ માણસને આટલા પૈસા ક્યાંથી આવશે?

પીએમ મોદી વિશે પ્રતિક્રિયા આપતા પાટીલે કહ્યું કે, પીએમ મોદીના કારણે દેશનો બચાવ થયો છે. પાટીલે કહ્યું, તે મને નોટિસ આપે અને મને પાર્ટીમાંથી હાંકી કાઢવાનો પ્રયાસ કરે. હું બધાને ખુલ્લા પાડીશ. દરેક જણ ચોર બનશે તો રાજ્ય અને દેશને કોણ બચાવશે? પીએમ મોદીના કારણે દેશ બચ્યો છે. સાચું કહું તો દરેકને ડરમાં રાખવા જોઈએ. આ દેશમાં ભૂતકાળમાં અનેક કૌભાંડો થયા છે.

બીજેપી ધારાસભ્યના આ આરોપો બાદ કર્ણાટકના સીએમ સિદ્ધારમૈયાની પ્રતિક્રિયા પણ સામે આવી છે. તેમણે કહ્યું, ભાજપના ધારાસભ્યના આ આરોપોએ અમારા અગાઉના પુરાવાઓને વધુ મજબૂત બનાવ્યા છે. તેમણે આરોપ લગાવ્યો કે ભાજપ સરકાર ‘40% કમિશનની સરકાર’ છે. જો આપણે યત્નાલના આરોપને ધ્યાનમાં લઈએ તો એવું લાગે છે કે ભ્રષ્ટાચાર આપણે જે વિચાર્યું હતું તેના કરતા 10 ગણો મોટો છે. અમારા આરોપ પર બૂમો પાડતા ગૃહની બહાર આવેલા ભાજપના મંત્રીઓનું જૂથ હવે ક્યાં છુપાઈ ગયું છે?’